வெள்ளிமலையில் ஸ்ரீமத் சுவாமி அம்பானந்தஜி மகராஜ் ஜெயந்தி விழா 10-ம் தேதி நடைபெறுகிறது
கன்னியாகுமரி மாவட்டம், வெள்ளிமலை: வெள்ளிமலையில் அமைந்துள்ள ஸ்ரீ விவேகானந்தர் ஆசிரமத்தின் ஸ்தாபகரும், ஆன்மிகப் பேரொளியுமான ஸ்ரீமத் சுவாமி அம்பானந்தஜி மகராஜ் அவர்களின் ஜெயந்தி விழா வருகிற 10-07-2026 (வெள்ளிக்கிழமை) அன்று பக்தி பூர்வமாக நடைபெற உள்ளது.
இந்த ஜெயந்தி விழா அன்று காலை 10.00 மணி முதல் மதியம் 1.00 மணி வரை ஆசிரம வளாகத்தில் நடைபெறுகிறது. விழாவையொட்டி பல்வேறு ஆன்மிக நிகழ்ச்சிகள் ஏற்பாடு செய்யப்பட்டுள்ளன.
நிகழ்ச்சியில் பஜனை, ஆன்மிகச் சொற்பொழிவு, ஸ்ரீராமகிருஷ்ண ஹோமம், மகா ஆரத்தி மற்றும் பிரசாதம் வழங்குதல் உள்ளிட்ட நிகழ்வுகள் நடைபெறவுள்ளன. இந்த நிகழ்ச்சிகள் மூலம் பக்தர்கள் ஆன்மிக அமைதியையும், இறையருளையும் பெறும் வாய்ப்பு ஏற்படுத்தப்பட்டுள்ளது.
ஸ்ரீமத் சுவாமி அம்பானந்தஜி மகராஜ் அவர்கள் ஆன்மிகப் பணிகள், சேவை மனப்பான்மை மற்றும் மனிதநேயச் சிந்தனைகளின் மூலம் எண்ணற்ற மக்களின் வாழ்க்கையில் ஒளியேற்றிய மகானாகப் போற்றப்படுகிறார். அவருடைய ஜெயந்தி தினத்தை முன்னிட்டு ஆண்டுதோறும் ஆசிரமத்தில் சிறப்பு வழிபாடுகள் மற்றும் ஆன்மிக நிகழ்ச்சிகள் நடத்தப்பட்டு வருகின்றன.
இந்த ஆண்டு நடைபெறும் ஜெயந்தி விழாவில் அனைத்து பக்தர்களும், பொதுமக்களும் குடும்பத்துடன் கலந்து கொண்டு, ஸ்ரீ ராமகிருஷ்ணர், ஸ்ரீ சாரதா தேவி, ஸ்ரீ விவேகானந்தர் மற்றும் ஸ்ரீ குருமஹராஜின் திருவருளைப் பெறுமாறு ஆசிரம நிர்வாகம் அன்புடன் அழைப்பு விடுத்துள்ளது.
இந்தத் தகவலை ஸ்ரீ குருமஹராஜ் பணியில், சுவாமி சைதன்யானந்தர் தெரிவித்துள்ளார்.
